Kryetari i AKR-së, Behgjet Pacolli, ka komentuar seancën e Këshillit të Sigurimit të OKB-së, në të cilën u përball presidentja Vjosa Osmani me homologun serb, Aleksnadar Vuçiq.
Në një shkrim në platformën “X”, ka thënë se Vuçiq, Osmani dhe Kurti duhet të lënë mënjanë ofendimet dhe provokimet e ndërsjella për të vendosur një nivel të respektit për palët në dialog.
“Të dyja palët duhet të ulen dhe të përpiqen të gjejnë zgjidhjen e duhur për çështjet që rëndojnë marrëdhëniet ndërmjet Kosovës dhe Serbisë”, shkroi Pacolli.
Ndaj tij, ka reaguar këshilltari për media i presidentes Vjosa Osmani, Bekim Kupina.
Ai i tha se nëse Pacolli turpërohet nga e vërteta e historisë së dhimbshme nga lufta e vitit 1999, kjo ka të bëjë me mungesën e respektit tënd ndaj shtetit të Kosovës dhe ndaj viktimave të regjimit serb.
“E vërteta jonë nuk është as ofendim e as provokim”, tha ai.
Sipas tij, fjalët e Pacollit janë ofendim dhe përçmim për Republikën e Kosovës, për mijëra viktima civile përfshirë fëmijë të djegur për së gjalli, për gjakun e dëshmorëve tanë dhe për gratë viktima të dhunës seksuale gjatë luftës.
“Barazimi që ti ia bën propagandës serbe me të vërtetën e Kosovës, të dëshmuar edhe nga gjykata ndërkombëtare, është barazim i agresorit me viktimën, politikë e njohur serbo-ruse”, shkroi Kupina./Telegrafi/
