Këngëtarja e njohur Dafina Rexhepi e cila hyri fuqishëm në tregun muzikor vite më parë dhe më pas pauzoi për një kohë, nuk e ka në plan të ndalet.
Ajo ka sjell projektin e saj më të ri muzikor, këngën dhe klipin “Gimme ur Love”, e cila është pasuese e një tjetër kënge shumë të pëlqyer që këngëtarja publikoi gjatë verës.
Në një intervistë për Telegrafin, Rexhepi kishte rrëfyer ekskluzivisht detajet e projektit të saj më të ri, i cili është pak më i veçantë.
“Kënga është punuar nga DJ A-boom, ndërsa tekstin e ka shkruar Zana Bikliqi. Është një këngë ritmike e zhanrit dancehall, të cilën shpresoj se publiku do ta mirëpres. Teksti i saj flet për një dashuri që është në prag ndarje, mirëpo me kalimin e kohës raportet mes dy të rinjve rregullohen”, kishte thënë këngëtarja Rexhepi për Telegrafin.
Ndërkohë, kënga është publikuar në YouTube edhe me klip, në të cilin Dafina shfaqet mjaft atraktive, gjersa ana vizuale e këtij projekti i është besuar produksionit Imagine Films.
Në përfundimin e bisedës për Telegrafin, Dafina kishte zbuluar se ky nuk do të jetë projekti i fundit të saj për këtë vit, kjo pasi ajo ka ndër mend të sjell edhe diçka tjetër.
“Pasi të lansoj këtë këngë, kam ndër mend të sjell edhe një bashkëpunim, të cilin dua ta lë befasi për momentin”, kishte shtuar ajo. /Telegrafi/
