Mbrojtësi i Interit, Joao Miranda është një objektiv i transferimeve të janarit për klubin portugez, FC Porto.
34-vjeçari Miranda ka mbetur një rezervistë në formacionin e Luciano Spallettit pas mbërritjes së Stefan de Vrij, i cili po luan në dyshe me Milan Skriniar.
Kjo ka bërë që mbrojtësi brazilian të vihet në siklet me situatën e tij dhe këtë po e përcjellin me kujdes klubet evropiane.
Sipas faqes braziliane të sportit UOL Esporte, klubi portugez Porto është shumë e interesuar në transferimin e Mirandas.
Mediat braziliane raportojnë se Porto ka pasur kontakte me agjentin e lojtarit, Deco, i cili është një ish-lojtar i gjigantëve portugezë.
Aty ia kanë bërë të qartë se e duan klientin e tyre për afatin kalimtar të dimrit.
Kontrata e Mirandas skadon në fund të sezonit dhe ai ka qenë në San Siro që nga transferimi i tij prej 13 milionë eurosh nga Atletico Madrid në vitin 2015.
Deri më tani këtë sezon, ai ka bërë pesë paraqitje për Interin në të gjitha garat. /Telegrafi/