Para dy ditëve u votua Qeveria e re e Maqedonisë me 62 vota Për, 44 vota Kundër dhe 5 vota të Përmbajtur. Qeveria e Maqedonisë tani ka përbërje të re! Shqiptarët përfaqësohen me nëntë ministra, BDI me gjashtë dikaster, Aleanca për shqiptarët me dy dhe një ministër pa resor i propozuar nga LSDM-ja. Ajo çka lë për të dëshiruar është mospërfshirja e grave në asnjë resorë si udhëheqëse nga partitë politike shqiptare.
Barazia gjinore në politikën e Maqedonisë është e një avazi dashakeqës. Gruaja ende vazhdon të përbuzet në politikë, sidomos nga partitë politike shqiptare.
Mospërfshirja e gruas në postet kyçe në politikën e Maqedonisë, paraqet një hendek ku gratë janë nënpërfaqësuara në politikë.
Kjo është një tregues për atë që maskilizmi si një steriotip kulturor i fortë, ende nuk ndryshon në vendosjen e grave në postet vendimarrëse. Pyetjes ‘Kush e ka fajin’? Politika dhe natyra maskiliste e shoqërisë shqiptare në Maqedoni nga njëra anë, apo vetë gratë dhe karakteri i veçantë i gruas si natyrë, çdo mendje e shëndoshë dhe paparagjykime ia jep lehtë përgjigjen.
Profesoresha universitare, Arta Toçi, thotë se pozitën e femrës shqiptare në shoqëri shumë shpesh e determinon trajtimi dhe pozicionimi i tyre nga shqiptarët dhe kjo gjë vjen në shprehje në të gjitha sferat e jetës.
”Ngase flasim për politikë, do të përqendrohem pikërisht te kjo sferë. Është për keqardhje se partia shqiptare, BDI, shumë vite më parë kishte vendosur një femër si ministre, ndërkaq në këtë qeveri, femra shqiptare do të mungojë në taborin politik shqiptar. Kjo nuk vjen si rezultat i mungesës së aftësive, por femra shqiptare bën beteja të përbashkëta me mashkullin dhe kur fitohet beteja, ajo fillon një betejë të re, që po dëshmohet si betejë e humbur. Partia nga e cila vij unë, LR-PDSH, nuk kishte komoditetin të bëjë përfshirje të dy gjinive, prandaj dhe nuk po e paragjykoj rezultatin në rrethana tjera. Është e nderuar një parti politike e cila në radhët e veta ka femra të cilat me arritjet akademike dhe profesionale, kanë bërë emër në jetën shoqërore. Partrneri i koalicionit, LSDM, i shfrytëzoi këto emra si aset për partinë. Kur arritjet personale do të kuptohen si vlerë për një parti politike, do të ndërtohen kritere që për bazë do t’i kenë cilësitë dhe jo gjininë”, vlerëson Toçi për Telegrafi Maqedoni.
Luljeta Ademi, aktiviste për të drejtat e njeriut në Maqedoni thekson faktin se, pjesëmarrja e gruas në vend, gjegjësisht në proceset vendimmarrëse në përgjithësi dhe në politikë në veçanti, mbetet në nivele shumë të ulëta në krahasim me vendet e tjera të Evropës Lindore e Qendrore.
”Edhe pse ligji aktual i Maqedonisë favorizon qartë këtë me kuota të përcaktuara për gratë. Vullneti i partive politike, sidomos shqiptare, për të futur përqindjet e pjesëmarrjes së gruas në vendimmarrje ka mbetur në letër. Kemi kohë që debatojmë: Pse duhet gruaja në politikë dhe në jetën publike? Cilat janë pengesat për pjesëmarrjen e gruas në politikë? Si duhet realizuar procesi i rritjes së rolit të gruas në vendimmarrje? Edhe pse ka disa modele pozitive nga të gjitha partitë politike, shumica e grave ballafaqohen me një frymë të ashpër politike. Gratë në politikë janë cilësi e demokracisë dhe mund të japin shumë më shumë nga mundësitë që iu ofrohen. Apel politikanëve shqiptarë që të mos “firkësohen” të kenë gratë pranë vetes, jo si gra por si kuadro të barabarta që denjësisht veprojnë dhe me shumë profesionalizëm të krijojnë politikat në cilindo nivel qofshin”, deklarohet Ademi.
Gratë, të suksesshme pothuajse në të gjitha sferat. Përbëjnë sot një potencial të madh jo vetëm numerik po edhe profesional e intelektual.
Gazetarja Anita Latifi për Telegrafi Maqedoni thotë se, demokracia moderne është e paimagjinueshme pa kyçjen e barabartë të grave në politikë.
”Sikur të i ishte kushtuar pak më shumë rëndësi senzibilizimit të opinionit dhe vetë partive për barazinë gjinore dhe sikur pak më shumë të ndikohej në ndryshimin e qasjes ndaj femrave në politikë, ndoshta rezultatet do të ishin më pak befasuese. Demokracia moderne është e paimagjinueshme pa kyçjen e barabartë të veprimit të meshkujve dhe femrave në proceset e vendimarrjes dhe në jetën publike dhe politike. Ne edhe një herë dëshmuam se “demokracia jonë moderne” le për të dëshiruar”, thekson Latifi.
Përderisa politika në Maqedoni do të vazhdojë të mbetet maskilisite, demokracia nuk mund të jetë e përparuar dhe cilësore. /Telegrafi/