Policia e Kosovës ka bërë të ditur se janë duke vazhduar kërkimet për gjetjen e një vajze nga Graçanica, e cila është raportuar si e zhdukur nga familjarët.
Zëdhënësja e policisë, Flora Ahmeti ka thënë për Telegrafin se viktima nuk është gjetur ende, dhe se kërkimet po bëhen edhe në liqenin e Badovcit.
“Referuar shkrimeve në portale të ndryshme ju njoftojmë, se personi i zhdukur nuk është gjetë akoma. Kërkimet për viktimën janë duke u bërë, bazuar në informacionet që posedojmë . Përveç lokacioneve të tjera, që nga mbrëmë policia në bashkëpunim me FSK, po vazhdon kërkimet edhe në liqenin e Badovcit . Për çdo detaj rreth rastit do të njoftoheni me kohë”, ka thënë Ahmeti.
Ndryshe policia përmes raportit 24 orësh ka njoftuar se ankuesi mashkull kosovar ka raportuar për rastin në fjalë- zhdukjen e motrës së tij.
“Sipas ankuesit motra e tij ka probleme psiqike. Në vendin e ngjarjes kanë dalë njësitë relevante policore dhe janë duke e hetuar rastin”, thuhet në raport. /Telegrafi/