Federata Shqiptare e Futbollit (FSHF) ka njoftuar me anë të faqeve zyrtare se ekziston mundësia e mos zhvillimit të ndeshjes Shqipëri-Angli në kuadër të kualifikimeve për Kupën e Botës “Katar 2022”.
Shqipëria është paraparë të presë Anglinë të dielën e 28 marsit në kuadër të ndeshjes së dytë të Grupit I në kuadër të eliminatoreve për Kupën e Botës.
Megjithatë, kjo ndeshje është në rrezik të zhvillohet pasi autoritetet e policisë shtetërore dhe lokale kanë refuzuar të mbikëqyrin dhe sigurojnë ndeshjen.
Është vet faqja zyrtare e FSHF-së e cila ka njoftuar me anë të faqeve zyrtare se zhvillimi i ndeshjes Shqipëri-Angli është në rrezik.
Njoftimi pa ndërhyrje i FSHF-së
DEKLARATË PËR SHTYP!
Sot në Federatën Shqiptare të Futbollit ka mbërritur një shkresë, me numër protokolli 2877, e datës 23.03.2021, nga Drejtoria Vendore e Policisë Tiranë, me firmën e Drejtuesit të Parë, Rebani Jaupi, e cila thekson se strukturat e Drejtorisë Vendore të Policisë Tiranë nuk garantojnë marrjen e masave para, gjatë dhe pas zhvillimit të ndeshjes Shqipëri-Angli, në datë 28 Mars 2021, ora 18:00.
Gjendur përballë situatës ku autoritetet shtetërore nuk kanë reaguar pas kërkesës së Federatës Shqiptare të Futbollit, të datës 17.03.2021, me numër protokolli 538, drejtuar Znj. Dallëndyshe Bici, Drejtuese e Inspektoriatit Kombëtar të Mbrojtjes së Territorit dhe Z. Mariglen Qato, Drejtues i Inspektoriatit Urbanistik Vendor Bashkisë Tiranë, për lirimin e hapësirave në perimetrin e Stadiumit Kombëtar “Air Albania”, kërkojmë reagim urgjent të këtyre strukturave.
Anulimi i ndeshjes Shqipëri-Angli e parashikuar për t’u luajtur në “Air Albania Stadium”, do të kishte pasoja katastrofike për imazhin e vendit tonë, ekipin Kombëtar dhe në përgjithësi për futbollin shqiptar.
/Telegrafi/
