Policia e Kosovës ka reaguar lidhur me disa shkrime të publikuara në disa media serbe, për kinse humbjen e municionit në veri gjatë operacionit të arrestimit të Marko Gjuriqit.
Radio Televizioni i Serbisë ka raportuar gjatë ditës së sotme se Policisë së Kosovës gjatë arrestimit të Marko Gjuriqit në Mitrovicën Veriore i ka humbur municion.
Në njoftim thuhet se, Policia e Kosovës (PK) e adreson këtë informacion zyrtar për media me qëllim të informimit të drejtë të opinionit publik, lidhur me disa shkrime të publikuara sot në disa media/portale kryesisht serbe, ku sipas tyre pretendohet kinse humbja e municionit (një karikator me municion) të njësiteve speciale.
“Policia e Kosovës siguron opinionin e gjerë se informacionet e tilla, të publikuara nga mediumet serbe, nuk qëndrojnë, janë të pavërteta dhe kanë për qellim vetëm dezinformimin e qytetarëve.
Ashtu siç e kemi bërë të ditur deri më tani, me datë 26.03.2018, PK-ja bazuar në planifikimet policore, ka qenë e angazhuar në zbatim të vendimit të Ministrisë së Punëve të Jashtme të Republikës së Kosovës (RKS) për ndalim të vizitës në Kosovë të zyrtarëve serbë të cilët nuk kanë poseduar leje për hyrje në Kosovë, dhe pas përfundimit të operacionit policor nuk është evidentuar asnjë humbje e pajisjeve apo municionit zyrtar të asnjë njësie policore.
Policia e Kosovës mbetet e përkushtuar në realizimin e detyrave dhe përgjegjësive të saja ligjore, duke përfshirë angazhimet e saja profesionale me qëllim të ofrimit të sigurisë, ruajtjes së rendit dhe qetësisë publike, si dhe njoftimit të drejtë të opinionit publik”, thuhet në sqarimin e Policisë së Kosovës. /Telegrafi/