Raportimi i mediave se në oborrin e Qendrës Klinike Universitare të Kosovës (QKUK), është gjetur trupi i pajetë e një fëmije, është demantoruar nga Policia e Kosovës dhe QKUK-ja.
Zëdhënësja e Policisë së Kosovës, Flora Ahmeti ka theksuar për Telegrafin se në policia e ka marrë informacion se në oborrin e QKUK-së është hapur një gropë.
Sipas saj, me të arritur në vendin e ngjarjes, është vërejtur se në atë atë hapësirë është varrosur një qen i vogël.
“Nuk ka asgjë tjetër. Ne jemi duke u marrë me rastin”, ka shtuar Ahmeti.
Zëdhënësi i QKUK-së, Shpend Fazliu ka theksuar se punëtorët e pastrimit dhe mirëmbajtjes se oborrit gjatë pastrimit dhe mirëmbajtjes se kopshtit dhe prerjes se barit kanë dyshuar në një varrezë, afër objektit te psikiatrisë së fëmijëve.
Ai ka thënë për Telegrafin se përmes kompanisë së sigurimit fizik u njoftua policia, dhe pastaj sipas tij, kane ardhur ekipet e forenzikës ku është konstatuar se bëhet fjalë për një qenë të groposur e jo diçka tjetër.
Ndryshe, mediat kanë raportuar se në oborrin e QKUK-së është gjetur një varrezë ku dyshohet se është trupi i një fëmije. /Telegrafi/