Policia e Kosovës ka njoftuar se ka arrestuar dy persona në Pejë, të cilët ishin përfshirë në një rrahje gjatë muajit dhjetor.
Policia bën të ditur se arrestimi i tyre ka ndodhur më 3 janar, rreth orës 23:00, transmeton Telegrafi.
“Më datë 22 dhjetor 2021 rreth orës 22:00, Policia është informuar për një rast, i cili ka ndodhur në një lokal në rrugën ‘Adem Jashari’ në Pejë. Policia menjëherë ka dalë ne vendngjarje, aty është informuar se katër persona të lënduar nga mjetet e mprehta janë dërguar në Spitalin Rajonal në Pejë, ndërsa njëri nga të lënduarit për shkak të natyrës së lëndimeve është dërguar në QKUK-Prishtinë”, thuhet në njoftim.
Policia tutje, ka njoftuar se të dyshuarit e rastit kanë ikur nga vendi i ngjarjes, në drejtim të panjohur.
“Pas një pune intensive të Policisë, me datë 03.01.2022 rreth orës 23:00, është arritur vendndodhja e dy personave të dyshuar, të cilët janë arrestuar nga Policia”.
Të dyshuarit pas intervistimit me urdhër te Prokurorit të shtetit iu është caktuar masa e ndalimit Policor prej 48- orësh. /Telegrafi/