Lëvizja Socialiste për Integrim është duke u përgatitur që të shkëputet përfundimisht nga koalicioni me Edi Ramën dhe të dalë më së paku e vetme në zgjedhjet parlamentare të qershorit.
Sinjalet e para u dhanë të enjten në mbrëmje nga ministri i Drejtësisë, Ylli Manjani, i cili në intervistën në Top Channel konsideroi të papranueshëm faktin që Rama përfshiu në koalicion PDIU e Shpëtim Idrizit duke kërkuar shpjegime pse kryeministri ndërmori këtë hap.
Kurse e drejtpërdrejtë ka qenë po të enjten mbrëma, deputetja e LSI, Silva Caka. Duke folur në emisionin Debati në Channel One, Caka tha se LSI duhet të dalë e vetme në zgjedhje, pa PS, ndonëse nxiton të sqarojë se mendimi i saj është personal.
“Ky është mendimi im personal që për mua do të jetë votë publike në forumet e LSI, por a do të fitojë mendimi im apo jo, këtë do ta kenë në dorë forumet e partisë”, ka thënë ajo, citon Noa.
Deputetja Caka mendon se LSI duhet të dalë e vetme në zgjedhjet parlamentare të 18 qershorit. Ajo bëhet kështu, e para deputete e kësaj force politike që shprehet hapur për pozicionin që duhet të ketë LSI në zgjedhjet parlamentare të 18 qershorit.
Ajo që pritet tani është shpallja zyrtare e vendimit të LSI nëse do t’i përgjigjet pozitivisht apo negativisht ftesës së bërë publike nga kryeministri për të vazhduar koalicionin e nisur më 1 prill 2013.