Policia e Kosovës sot ka gjobitur infermieren e Klinikës Infektive, Shqipe Kadriu për mos mbajtje të maskës, përderisa ajo ishte duke hyrë në banesën e saj.
Kadriu përmes një postimi në Facebook, thotë se zyrtarët policor që i shqiptuan asaj dënimin, nuk e kishin as vet të vendosur maskën siç duhet.
“Kolegia më ofroi me veturë afër banesës, sapo dola e tërhoqa maskën ndër mjekër pasi isha vet në rrugë. Policia më ndaloi, u mundova t’ju tregoj që kam të drejt por s’më dëgjonin, i thash: as to se ke vënë mirë pasi ke lënë hundën jashtë dhe ma shkruan një dënim, më than shko ankohu…ku…gjeje vendin! WTF ku jemi ka jetojmë”, ka shkruar infermierja Kadriu.
E njëjta që nga fillimi i pandemisë COVID-19, është duke luftuar bashkë me shumë pacientë të shtrirë në Klinikën Infektive, që ta mposhtin këtë betejë.
Edhe infermieri i Klinikës së Gjinekologjisë Liburn Dema është gjobitur para dy ditësh nga Policia, pasi nuk kishte vendosur maskë derisa ishte në veturë me bashkëshorten dhe fëmijët e tij.
Ligji anti Covid ka hyrë në fuqi para dy javësh, i cili parasheh gjoba 35 euro për mos vendosje të maskës, por nuk specifikon se kur qytetarët mund të mos mbajnë maska.
Ndërkaq në rekomandimet e CDC-së amerikane qytetarët nuk rekomandohen të mbajnë maska kur janë në veturë me familjarë të ngushtë. /Telegrafi/