Në kuadër të ndihmave që po dërgohen në zonat e prekura nga tërmeti në Shqipëri, kanë qenë aktiv edhe grupi i tifozëve nga kryeqyteti i Kosovës, Plisat.
Ata që nga dita e djeshme janë duke grumbulluar gjësende të ndryshme në qendër të Prishtinës, e të cilat po dërgohen kohë pas kohe në Shqipëri.
Njëri nga drejtuesit e Plisave, Besnik Mujeci ka thënë për Telegrafin se ata kanë vendosur të solidarizohen sipas tij, me bashkëkombësit në këto momente të vështira.
Ai ka thënë se i bën thirrje të gjithëve që të mos i ndërprenë ndihmat në drejtim të atyre që janë dëmtuar nga kjo fatkeqësi.
“Një solidarizim i jashtëzakonshëm. Një falënderim shkon për të gjithë qytetarët e Kosovës për këtë ndihmë të madhe që po e bëjnë. Përndryshe, e kemi për obligim dhe borxh me ju ndihmu. Kjo është gjëja më e vogël që mund ta bëjmë për ta. Ndihma e qytetarëve po na bën mu ndi mirë dhe krenar. Ju bëjë apel mos u ndalni deri në fund, sepse e kemi obligim me ju ndihmu. Hapat e parë janë ndihma me gjëra elementare, por qëllimi është edhe me ua rindërtua edhe ato banesat që janë rrënuar”, ka shtuar Mujeci.
Sipas tij, kjo është mauna e katërt që do ta dërgojnë grupi i tifozëve Plisat drejt Shqipërisë.
Ndryshe, në orët e para të së martës në zonën e Durrësit, ka ndodhur një tërmet, i cili për pasojë ka lënë të vdekur deri me tani 31 persona, mbi 650 të lënduar, si dhe 16 persona të zhdukur.
Solidarizimi i shqiptarëve të Kosovës me të prekurit nga kjo fatkeqësi natyrore, ka qenë jashtëzakonisht i madh, duke i mobilizuar prej institucioneve e deri te qytetari i thjeshtë. /Telegrafi/