Miralem Pjanic është ndër futbollistët e rrallë qe e kanë pasur mundësinë të luajnë në të njëjtën skuadër edhe me Lionel Messin edhe me Cristiano Ronaldon.
Mesfushori i Barcelonës kthehet në Torino, ku do të luajë përballë Juventusit, skuadër pjesë e të cilës ishte gjatë viteve 2016-2020.
“Jam shumë i gëzuar që ndodhem këtu, ndërsa kthimi është shumë emocional për mua. Kalova katër vite këtu dhe kam kujtime pozitive, jam i gëzuar që ndodhem këtu dhe do t’i shoh njerëzit me të cilët kam punuar, jam i gëzuar që do ta shoh skuadrën dhe gjithë stafin, por tash ndodhem këtu për t’u përgatitur për një ndeshje shumë të vështirë përballë një kundërshtari të vështirë që e do vendin e parë në fazën grupore, njësoj si ne, prandaj duam të jemi të përgatitur”, ka thënë fillimisht boshnjaku në konferencën për shtyp.
Pjanic është në listën e 14 lojtarëve që e kanë pasur fatin të luajnë në të njëjtën skuadër edhe me Messin edhe me Ronaldon.
“Kam folur me Messin për vitet që i kam kaluar këtu, kam thënë fjalë të mira për klubin dhe presidentin. Asgjë më shumë se kaq, ai është i informuar mirë, e njeh Juventusin shumë mirë”.
“Është shumë e veçantë që më është dhënë mundësia të luaj edhe me Messin edhe me Ronaldon, ata janë fenomenë absolutë, është gjë e shkëlqyer të bashkëpunosh me ta”.
“Do t’u tregoj nipërve se ata janë në mesin e futbollistëve më të mirë të të gjitha kohërave dhe se kam luajtur me që të dy, jo shumë lojtarë e kanë bërë këtë”.
“Messi e di situatën (e Ronaldos) mirë, ai i përcjell lajmet, është duke u përgatitur për ndeshjen”, ka deklaruar më tej Pjanic. /Telegrafi/