Drejtorsha politike pranë Ministrisë së punëve të jashtme të Mbretërisë së Bashkuar, Karen Pierce, është takuar me kryetarin e Kuvendit, Talat Xhaferi, përcjell Telegrafi Maqedoni.
Pas takimit, Pierce tha se palët duhet të ndjekin proceset demokratike në vend dhe se shteti ka nevojë për qeverisje dhe opozitë lojale.
”Nuk i takon Mbretërisë së Bashkuar që të tregojë se çfarë qeverie duhet të ketë Maqedonia, por jam këtu për të shprehur mbështetjen për qytetarët e Maqedonisë. Ne mbështetim integrimin e vendit në NATO dhe BE. Sot e takova kryetarin e kuvendit, Talat Xhaferi, dhe dua që të përsëris se strukturat udhëheqëse duhet të punojnë për qytetarët.
U takova me Zaevin dhe liderët tjerë të koalicionit, do të takohem edhe me Gruevskin. Po e sjell porosinë e njëjtë, mbështetjen për demokracinë dhe përfshirjen e qytetarëve dhe se duhet të tejkalohen dallimet etnike.
Kur flasim për demokracinë, jo vetëm qeverisja, por edhe opozita duhet të jetë lojale dhe e fuqishme. Do të theksoj se sa me rëndësi janë proceset demokratike, ekonomia, drejtësia dhe se jemi të gatshëm të punojnë me Maqedoninë për zhvillimin e demokracisë. Presim nga liderët politik që të ndjekin proceset demokratike”, theksoi Karen Pierce, pas takimit me Talat Xhaferin./Telegrafi/