Seleksionuesi i Përfaqësueses së Zvicrës, Vladimir Petkoviq, nuk beson se Xherdan Shaqiri e Granit Xhaka do të largohen pas përfundimit të “Euro 2016” për të luajtur për Kosovën, e cila në fillim të këtij muaji është pranuar në UEFA.
Në një intervistë për të përditshmen zvicerane “Blick” Petkoviq ka thënë se llogarit në dy futbollistët kosovarë edhe pas përfundimit të “Euro 2016.
Shaqiri 24-vjeçar është pjesë e Zvicrës prej vitit 2010 dhe deri më tani ka regjistruar 51 ndeshje. Ndërsa Xhaka ka 40 paraqitje dhe ka debutuar një vit më vonë se Shaqiri. Që të dy, llogariten ndër lojtarët kryesor të ekipit helvetik, shkruan kohaditore.
“Është e mundur që Xhaka të ndërrojë mjedis, por sa i përket klubit”, ka thënë Petkoviq buzagaz.
“Në lidhje me Kosovën, Valon Behrami ka thënë më të mirën deri më tash. Për këtë arsye, nuk frikësohem se Shaqiri e Xhaka do të largohen nga Zvicra pas Kampionatit Evropian”, ka thënë Petkoviq. Behrami më herët kishte thënë se do të vazhdojë të luajë për Zvicrën, pasi edhe mosha e shtyrë për një futbollist nuk i lejon të bëjë aventura.