Në Pallatin e Rinisë dhe Sporteve në kryeqytet zhvillohet ndeshja e tretë e serisë finale të ‘play-offit’, ndërmjet Sigal Prishtinës dhe Bashkimit.
Skuadra nga Prizreni është në epërsi prej dy fitoreve dhe është vetëm një triumf larg titullit të kampionit në IP Superligën e Kosovës në basketboll.
Bashkimi e fitoi ndeshjen e parë në kryeqytet (84-81), para se të fitonte edhe në palestrën “Sezai Surroi” para tifozëve të vet (97-80).
Prandaj fitorja eventuale në ndeshjen e sotme (e shtunë) do t’ia sigurojë titullin e parë të kampionit të Kosovës.
Sigal Prishtina që është në kërkim të titullit të 12-të, duhet doemos të fitojë për të tentuar rikthimin në ndeshjet e mbetura, kur kihet parasysh se seria finale mund të zhvillohet deri në pesë ndeshje dhe skuadra që regjistron tri fitore shpallet kampion.
Pesëshja startuese e Sigal Prishtinës: Azemi, F. Rugova, Bunjaku, Veseli, Bundovic.
Pesëshja startuese e Bashkimit: Tmusic, Morina, Moss, Zenelaj, Zollo.
Sigal Prishtina është kampion në fuqi, ndërsa në këtë edicion e ka fituar Kupën e Kosovës duke e mposhtur në finale pikërisht Bashkimin. /Telegrafi/