Një person është gjetur pa shenja jete pasditën e së dielës në varrezat e fshatit Gurakoc të Istogut.
Lajmin e ka bërë të ditur zëdhënësi i policisë për rajonin e Pejës, Fadil Gashi.
Ai tha se policia ka marrë informacionin rreth orës 16:45, ndërsa ka shkuar në vendin e ngjarjes.
Gashi shtoi se mjeku kujdestar ka konstatuar vdekjen e tij.
“Policia është njoftuar se një person është gjetur pa shenja jete në varrezat e Gurakocit. Mjeku kujdestar ka konstatuar vdekjen e tij,” ka thënë ai.
Ndërsa bëhet e ditur se personi i vdekur është Triumf Ferati – djali i vogël i ish-kryetarit të Komunës së Istogut, të ndjerit Fadil Ferati, dhe vëllai i kryetarit aktual, Ilir Ferati.
Prokuroria Themelore në Pejë ka njoftuar se trupi i pajetë i një personi, i gjetur në fshatin Gurakoc të Istogut më 24.03.2024, u dërgua për obduksion në Institutin e Mjekësisë Ligjore.
“Me urdhër të prokurorit të shtetit trupi i pajetë i viktimës është dërguar në IML për obduksion. Pasi të pranojmë raportin do mësojmë rreth shkaqeve të vdekjes së të ndjerit”./Telegrafi/