Kryetari i Komisionit Hetimor për energji, Hajdar Beqaj, dhe nënkryetari i këtij komisioni, Armend Muja, janë përplasur verbalisht në përfundim të mbledhjes së të premtes, pasi nuk arritën të miratonin listën me emrat e dëshmitarëve që do të thirren për intervistim.
Shumica e anëtarëve ishin pro heqjes nga lista të atyre që gjenden në Hagë, ndërsa Muja tha se të vetmit që duhet të hiqen janë të vdekurit.
Pasi përfundoi mbledhja, Muja dëgjohet duke i thënë Beqajt që të bëhet më serioz dhe të mos ndërhyjë në punët e administratës, ndërsa Beqaj tha se mund të propozojë heqjen nga lista emrat që dëshiron.
“Po mundohesh të bësh politikë. Nuk ke të drejtë të ndërhysh në punët e administratës. E ke hallin me e heq PDK-në nga përgjegjësia, por ne nuk e lejojmë”, tha Mujaj drejtuar Beqajt. /Telegrafi/
