Në fushën e TSV 1865 Dachau u mbajt festa verore dhe e përfundimit të vitit shkollor 2022-2023, në të cilën morën pjesë të gjitha klasat e mësimit plotësues të gjuhës shqipe në Bavari.
Të pranishëm ishin konsulli i përgjithshëm i Republikës së Kosovës në Mynih, Afrim Nura, nënkryetarja e klubit të TSV 1865 Dchau Gabi Siegel, zv. administratorja e qarkut të Dachaut Burkhard, kryetarja e shoqatës “Naim Frashëri” të Austrisë, Antigone Elshani, të cilët na nderuan me pjesëmarrjen e tyre, gjithashtu dhe me fjalën përshëndetëse.
Kryetari i LAPSH-it, Milazim Ukaj në fjalën e tij të hapjes i uroi mirëseardhjen të gjithë të ftuarve, nxënësve, mësueseve e prindërve.
Festa u shoqërua me kuizin e diturisë dhe ishte e larmishme me këngë, valle, recitime, arte figurative e plot lojëra zbavitëse.
Koordinatori i LAPSH-it, Mustafë Krasniqi sqaroi strukturën dhe rëndësinë e kuizit për të gjithë nxënësit garues.
Nxënësit të ndarë në dy grupe kuq e blu, valëviten jo vetëm dy flamujt tanë, por performuan më së miri në gjuhën shqipe, dijenitë e tyre në sferën e historisë, kulturës dhe traditës shqiptare.
Aktiviteti i përgatitur me kujdes dhe profesionalizëm nga stafi i arsimtarëve nën drejtimin e grupit organizativ të LAPSH-it, u moderua mjaft bukur në të dy gjuhët shqip- gjermanisht nga Fatbardha Nikçi.
Një risi e veçantë e këtij evenimenti ishte shpërndarje e dëftesave për të gjitha klasat e Shkollës Shqipe në Bavari, e cila u pasqyrua në buzëqeshjet e lumtura e plot krenari të nxënësve.
Gatimet tradicionale shqiptare e zbukuruan festën verore dhe shpalosën rishtazi traditën shqiptare të mikpritjes.
Kjo festë të kësaj përmase, u mbështet nga disa biznese nga diaspora.
