San Antonio Spurs është goditur nga lajmi se Tony Parker nuk do të mund të vazhdojë të luajë për pjesën e mbetur të playoffit të këtij viti.
Organizatori veteran i San Antonios pësoi një lëndim në tendinën e kuadricepsit të majtë në çerekun e katërt të ndeshjes së dytë ndaj Houston Rockets të zhvilluar në AT&T Center.
Spurs tash ka konfirmuar se pas skanimeve MRI është konstatuar se playoffi për francezin ka përfunduar dhe se Spurs nuk mund të llogarisin në një nga lojtarët më esencial për skuadrën, shkruan Telegrafi.
Parker kishte mesatare prej 15 pikësh këtë playoff, dukshëm më e mirë se sa e sezonit të rregullt çka e dëshmoi formën e tij fenomenale atëherë kur më së shumti ekipit të tij i është dashur.
Tash i mbetet Gregg Popovichit që të mendojë aktivizimin e të rinjve Dejounte Murray dhe Bryn Forbes, kurse Leonard pritet të marrë edhe më shumë përgjegjësi për shënimin e pikëve të skuadrës. /Telegrafi/