Përballje e fortë midis përfaqësuesve të pozitës dhe të opozitës pritet të jetë në tryezën e së mërkurës për demarkacionin.
Faktet e Qeverisë do t’i prezantojë Komisioni Shtetëror për Demarkacionin, ndërsa deputetët e opozitës bashkë me ekspertët e fushës do t’i paraqesin argumentet e tyre për humbjen e 8000 hektarëve tokë.
Përfaqësues të pozitës dhe opozitës nesër do ta kenë përballjen e parë institucionale për demarkacionin e kufirit me Malin e Zi, gati një vit pas nënshkrimit të kësaj marrëveshjeje, shkruan “Zëri”.
Kjo njëherësh pritet të jetë një përballje e fortë mes dy taborëve politikë, për shkak të insistimit të opozitës në njërën anë se Kosova po i humb 8000 hektarë tokë dhe kundërshtimit të pretendimeve të tilla nga ana e pozitës në anën tjetër.
Të mërkurën, në tryezën profesionale-shkencore pritet të qartësohet shumëçka rreth marrëveshjes për shënimin e vijës kufitare mes Kosovës dhe Malit të Zi.
Në tryezën e 3 gushtit, dy blloqet pro dhe kundër kanë bërë gati argumentet e tyre, me të cilat pretendojnë të bindin opinionin dhe njëra-tjetrën se kanë të drejtë në mbrojtjen, përkatësisht në kundërshtimin e kësaj marrëveshjeje. Ndërsa liderët shtetërorë kanë bërë thirrje që kjo tryezë të shërbejë për unitet politik e partiak, si dhe argumentues. /Zëri/