Banorët e Pejës, 6056 sish, i kanë thënë jo privatizimit të Kinemasë “Jusuf Gërvalla” dhe kanë përkrahur revitalizimin e skenës së pavarur të kulturës në qytetin e Pejës.
Në konferencën për media në lidhje me peticionin për anulimin e likuidimit të Kinemasë “Jusuf Gërvalla”, u bë e ditur se mbledhja e nënshkrimeve ka zgjatë 10 ditë, kurse gjatë kësaj kohe 6056 banorë i janë përgjigjur thirrjes së iniciativës.
Sipas njoftimit, të nënshkruarit në peticion kanë kërkuar, anulimin e procesit të privatizimit përmes likuidimit të Kinemasë nga Agjencia Kosovare e Privatizimit, dhe mbështetjen e organizatave të pavarura kulturore dhe rrjetit të organizatave të kulturës në Pejë për të revitalizuar kinemanë e qytetit.
Skena e pavarur e kulturës në qytetin e Pejës, është deklaruar se do të vazhdojë iniciativën deri në momentin kur anulohet procesi i likuidimit.
Në konferencë pjesëmarrësve u është përkujtuar që 70 organizata të shoqërisë civile janë angazhuar në iniciativën për t’ia kthyer kinemanë qytetit, e strukturuar rreth një numri veprimesh, që kanë pasuar deklaratën e përbashkët.
Rekomandimet e shoqërisë civile për institucionet shtetërore janë:
1. Anulimin e procesit të privatizimit (përmes likuidimit) të Kinemasë “Jusuf Gërvalla” nga Agjencia Kosovare e Privatizimit,
2. Mbështetja e organizatave të pavarura kulturore dhe rrjetit të organizatave të kulturës në Pejë për të revitalizuar kinemanë e qytetit,
3. Ngritja e fondeve nga buxheti shtetëror, donatorët ndërkombëtar dhe vendor dhe palët e tjera për restaurimin dhe rifunksionalizimin e ndërtesës së Kinema “Jusuf Gërvallës”. /Telegrafi/