Komuna e Klinës ka vazhduar takimet buxhetore me qytetarët e lokaliteteve të ndryshme, duke dëgjuar nevojat dhe kërkesat e tyre për përmirësimin e kushteve të jetesës.
Në dëgjimin e shtatë të mbajtur në Jashanicë, me pjesëmarrjen e banorëve nga fshatrat Gjurgjevik i Madh, Jashanicë, Dush i Vogël, Siqevë dhe Dobërdol, janë diskutuar projekte të rëndësishme për vitin 2025.
Gjatë takimit, u prezantua buxheti komunal për vitin e ardhshëm, me fokus në projekte që synojnë zhvillimin ekonomik dhe rritjen e mirëqenies sociale të qytetarëve.
Sipas një postimi në Facebook nga Komuna e Klinës, dy çështje kryesore dolën në pah si prioritete të rëndësishme për banorët e zonës, pastrimi i shtratit të lumit “Klina” dhe asfaltimi i rrugicave të mbetura në fshatin Dush.
“Fillimisht, u prezantua buxheti komunal për vitin 2025, duke u theksuar projektet kryesore kapitale që kanë për qëllim zhvillimin ekonomik të Komunës së Klinës dhe rritjen e mirëqenies sociale të qytetarëve”, kanë shkruar ndër të tjera ata.
Pastrimi i shtratit të lumit “Klina” u identifikua si një nevojë urgjente për përmirësimin e infrastrukturës dhe mbrojtjen e mjedisit në këtë zonë, e poashtu edhe asfaltimi i rrugicave në fshatin Dush ishte një tjetër çështje e theksuar nga banorët lokal.
