Kryeministri polak, Mateusz Morawiecki, ka njoftuar të martën se është vendosur në karantinë, pasi kishte pasur kontakt me një person i cili rezultoi pozitiv me COVID-19.
Sipas Reuters, përcjell Telegrafi, njoftimi i Morawieckit erdhi përderisa Polonia raportoi rreth pesë mijë raste me coronavirus të martën; hera e dytë që vendi raportoi shifër të ngjashme në periudhën 24 orëshe që nga fillimi i pandemisë.
“Të premten e kuptova që kisha pasur kontakt me një person që rezultoi pozitiv me COVID-19”, u shpreh kryeministri polak.
“Si rezultat i kësaj si dhe në përputhje me procedurat shëndetësore unë do t’i nënshtrohem karantinës”, tha Morawiecki.
“Jam në kontakt të vazhdueshëm me kolegët e mi si dhe qeveria do i kryejë obligimet si në kushte normale”, theksoi mes tjerash ai.
Ndryshe, numri i përgjithshëm i të prekurve në Poloni u rrit në 135 mijë, ndërsa deri më tani kanë ndërruar jetë rreth tre mijë persona. /Telegrafi/