Presidenti i Serbisë, Aleksandar Vuçiq, ka reaguar pasi Këshilli Gjyqësor i Kosovës sot e ka suspenduar kryetaren e Gjykatës Themelore në Mitrovicë, Liljana Stevanoviq, e cila të martën bashkë me disa komandantë stacionesh policore në Kosovë ka marrë pjesë në mbledhjen e Këshillit Kombëtar të Sigurisë së Serbisë në Beograd.
“Me urdhër të Albin Kurtit, është shkarkuar nga institucionet gjyqtarja serbe Liljana Stevanoviq, kurse në mëngjes (të së premtes) është përgatitur shkarkimi i të gjithë komandantëve dhe policëve serbë që kanë marrë pjesë në seancën e Këshillit të Sigurisë Kombëtare”, tha presidenti serb Vuçiq, në Instagram, përcjell Telegrafi.
Vuçiq thotë se “Albin Kurti ka vendosur të sulmojë serbët dhe ka shkelur marrëveshjen e Brukselit”.
“Marrëveshja e Brukselit nuk ekziston më. Albin Kurti është ai që dëshiron të shkatërrojë paqen në Kosovë. Është ai që dëshiron të sulmojë popullin serb me të gjitha këto vendime kudo që jeton, si në jug ashtu edhe në veri të Kosovës”, tha Vuçiq.
“Serbia dëshiron ta ruajë paqen dhe për shkak të gjithë kësaj paralajmërojmë vendet e QUINT-it dhe gjithë komunitetin ndërkombëtar. Mesazhi im i fundit është – çfarëdo që do të bëni – Serbia do të jetë me popullin e saj”, tha Vuçiq.
Përveç kryetares së Gjykatës Themelore në Mitrovicë, Liljana Stevanoviq, në në mbledhjen e Këshillit Kombëtar të Sigurisë së Serbisë në Beograd, të udhëhequr nga presidenti serb Aleksandar Vuçiq, kanë marrë pjesë edhe pesë eprorë të Policisë së Kosovës në veri të vendit.
Në takim ishin shefi i Hetimeve Rajonale në Mitrovicën Veriore, Nenad Simiq, Komandanti i stacionit policor në Mitrovicën Veriore, Goran Zivkoviq, Igor Vukadinoviq nga Stacioni policor në Leposaviq, komandanti i stacionit policor në Zubin Potok, Zvezdan Milivojeviq si dhe Shefi i Hetimeve në Zveçan. /Telegrafi/