Delegacioni i Republikës së Maqedonisë në New York, e udhëhequr nga kryeministri Zoran Zaev dhe ministri për punë të jashtme, Nikolla Dimitrov, sot e përfundon qëndrimin në Asamblenë e 72-të të Kombeve të Bashkuara, përcjell Telegrafi Maqedoni.
Në kuadër të kësaj vizite, delegacioni i Maqedonisë realizoi takime të shumta me përfaqësues të rëndësishëm ndërkombëtarë, ndër të cilët shefi i diplomacisë greke, Nikos Kotzias, përfaqësuesja e lartë e BE-së për punë të jashtme dhe politikë të sigurisë, Federica Mogherini dhe komisioneri evropian për politikë të fqinjësisë së mirë dhe zgjerim, Johannes Hahn.
Kryeministri Zaev gjatë qëndrimit në Kombet e Bashkuara pati mundësi të përshëndetet me presidentin e Shteteve të Bashkuara të Amerikës, Donald Trump.
Zaev realizoi edhe disa takime të rëndësishme në kuadër të aktiviteteve të Asamblesë së 72-të të KB-së në New York. Ai u pranua nga kryetari i Asamblesë së përgjithshme të KB, Miroslav Lajčák, me të cilin diskutuan për situatën në Ballkanin Perëndimor, por edhe për ndryshimet që përgatiten në Kombet e Bashkuara.
Në Asamblenë e 72-të Kombeve të Bashkuara, kryeministri Zaev mbajti fjalim, ku u shpreh se edhe Maqedonia dhe bota mund të ballfaqohen me konfliktet dhe prolemet nëse janë gjithë të bashkuar./Telegrafi/