Kryeministri i Kosovës, Avdullah Hoti ka reaguar pas miratimit të pesë marrëveshjeve ndërkombëtare financiare.
Hoti ka falënderuar koalicionin qeverisës dhe të opozitën për miratimin e marrëveshjeve, duke shtuar se këto do të ndihmojnë në zbatimin e programit për rimëkëmbje ekonomike.
“Falënderoj të gjithë deputetët, të koalicionit qeverisës dhe të opozitës, për miratimin e marrëveshjeve ndërkombëtare. Këto marrëveshje ndihmojnë në zbatimin e programit për rimëkëmbje ekonomike. Pres që në ditët në vijim të miratohen edhe rishikimi i buxhetit dhe ligji për rimëkëmbjen ekonomike, duke e kompletuar kështu të gjithë bazën ligjore për rimëkëmbjen ekonomike, që është shumë e nevojshme për qytetarë dhe biznese. Qeveria do të bëjë maksimumin që sa më parë të nis zbatimin e masave për rimëkëmbje ekonomike, me transparencë të plotë dhe në koordinimin me të gjithë akterët e tjerë, komunat, odat ekomomike, partnerët zhvillimorë, etj.”, ka shkruar Hoti, përcjell Telegrafi.
Me 84 vota për, asnjë kundër dhe asnjë abstenim janë miratuar pesë marrëveshjet ndërkombëtare financiare në Kuvend të Kosovës.
Kjo është hera e katërt që janë vendosur në votim këto marrëveshje. /Telegrafi/