Artistja shqiptare me renome botërore, Dua Lipa, këto ditë po qëndron në Shqipëri.
E shoqëruar nga familja dhe i dashuri i saj, Anwar Hadid, Dua ka vizituar vende të ndryshme të Shqipërisë, përfshirë një kopësht në qendër të Tiranës i cili është në ndërtim e sipër.
Kryeministri Edi Rama dhe Kryetari i Tiranës, Erion Veliaj, e kanë mirëpritur artisten në takim gjatë këtyre ditëve, teksa shumë figura publike e kanë përshëndetur ardhjen e saj këtu.
Por, një reagim interesant publik vjen nga këngëtarja e njohur shqiptare, Besa Kokëdhima, e cila në një shkrim të publikuar në InstaStory, ka shkruar me dëshpërim se nëse Dua do të vazhdonte të qëndronte në Kosovë (para largimit në MB), ajo nuk do të arrinte famën që ka sot.
Këngëtarja cek se krejt kjo vjen nga trajtimi që politikanët iu bëjnë talentëve këtu dhe mos mbështetjes së duhur për të arritur diçka nga vendi i tyre.
“Dua Lipa është një yll! Por Dua u bë edhe në një shtet e treg prej vërteti. Nuk do kish as pritje me lëvdata, kortezira e tapete po të kish qenë në Shqipëri, pa të drejta autori, pa prioritarizmin e mbështetje për artin, në kushte mjerane që e kanë katandisur artin dhe artistet shqiptarë. Po të kish qenë Dua në Shqipëri muzikën e saj do ta quanin jo komerciale, nga përdorimi i muzikës së saj do përfitonte zero të ardhura, do bazohej jetesa artistike mbi evente sporadike në klube apo përdorimit nga politikanët në prag fushatash apo nevoja inagurimesh. Këta habiten shumë që kur ke talent mund të bëhesh yll se në Shqipëri yjet e vetme nga kalon gjithçka janë politikanët. Rockstarët me ekstravagantë e shoumenët më të spikatur janë politikanët”, ka shkruar Besa në InstaStory.
Dua përndryshe po vazhdon të qëndrojë në Shqipëri, duke i shijuar disa ditë të mira pushimi. /Telegrafi/