Banorët shqiptarë në Komunën e Graçanicës vazhdojnë të përballen me sfida të mëdha. Përveç problemeve që ata kanë aktualisht me lejet për ndërtim, të njëjtit janë të diskriminuar edhe në punësim.
Zëvendëskryesuesi i Kuvendit Komunal të Graçanicës, Granit Gashi gjatë një interviste për Telegrafin, ka thënë se stafi i kësaj komune përbëhet kryesisht nga serbë, me vetëm tre shqiptarë në punë.
Ai ka thënë se kjo është shkelje e qartë e Ligjit për zyrtarë publikë dhe rregulloreve tjera.
“Banorët shqiptarë në Komunën e Graçanicës kanë jashtëzakonisht probleme të mëdha, të njëjtit janë të diskriminuar edhe në punësim pasi që nga komplet stafi i Komunës së Graçanicës, stafi që punojnë në Komunën, vetëm tre janë shqiptarë dhe të tjerë të gjithë janë serbë. Pra, nuk respektohet as Ligji për zyrtarët publikë, e as Rregulloret dhe aktet tjera nënligjore”, tha Gashi.
Gashi përmendi një rast konkret të diskriminimit nga Drejtoria e Arsimit në Komunën e Graçanicës.
Sipas tij kjo drejtori nuk menaxhon me asnjë institucion shkollor as në gjuhën shqipe, as në gjuhën serbe.
Gashi shton se me një staf të madh prej mbi 250 punëtorësh, një pjesë e tyre janë shpërndarë në drejtori të tjera, ndërsa të tjerët qëndrojnë në shtëpi duke marrë paga pa punuar.
Vlera e pagës së këtyre punëtorëve, e paguar nga Ministria e Arsimit, shkon përtej një milion e njëqind mijë euro në vit.
“Drejtoria e Arsimit në Komunën e Graçanicës nuk menaxhon me as me asnjë institucion shkollor, as ato në gjuhën shqipe, as ato në gjuhën serbe, por i ka të punësuar mbi 250 punëtorë, e që të njëjtit, një pjesë e tyre, diku në afër njëzet janë të shpërndarë në drejtori tjera me urbanizëm, kadastër në administratë, ndërsa të tjerët rrinë në shtëpi dhe marrin paga. Vlera sa paguan Ministria e Arsimit për ta në vit është mbi një milion e njëqind mijë euro”, tha Gashi.
Zëvendëskryesuesi i Kuvendit Komunal të Graçanicës, ka deklaruar se ky problem është i rëndësishëm dhe do të adresohet në instancat kompetente.
“Kjo situatë është e papranueshme dhe ne shumë shpejt do ta adresojnë këtë edhe të organet kompetente”, ka theksuar Gashi.
Ndryshe banorët shqiptarë të Graçanicës janë duke u përballur me diskriminim pasi që Komuna po aplikon standarde të dyfishta si i përket zbatimit të një rregulloreje për pajisjen me leje të ndërtimit.
Gashi ka theksuar se MAPL ka konstatuar kjo rregullore është e kundërligjshme dhe ka kërkuar nga komuna që e njëjta të shfuqizohet, derisa thotë se janë në pritje të një raporti final që do ta nxjerrë Avokati i Popullit.
Ai thotë se edhe pse MAPL ka kërkuar shfuqizimin e kësaj rregullore, Komuna e Graçanicës nuk e ka përfillë një gjë të tillë. /Telegrafi/
