Aleanca Kosova e Re duket se është në finalizim të emrave të ministrave të saj në Qeverinë e udhëhequr nga Ramush Haradinaj.
Nga burime brenda AKR-së, Gazeta Metro ka mësuar emrat e ministrave tjerë, përveç të Behgjet Pacollit, që do të jetë ministër i Punëve të Jashtme.
Një befasi duket të jetë Selami Shkodra, që pritet të jetë Ministër i Punëve të Brendshme e që është i afërt me Rrahim Pacollin dhe Gani Thaçin, vëllain e presidentit Hashim Thaçi. Shkodra në fakt punon bashkë me Pacollin dhe Thaçin në Byronë e Sigurimeve të Kosovës.
Emri tjetër që AKR pritet ta caktojë në një nga resorët kryesor qeveritar, në atë të Zhvillimit Ekonomik, është Valdrin Lluka. Ky ka punuar më herët në Agjencinë për Promovimin e Investimeve në Kosovë në kuadër të MTI-së, kur kjo ministri udhëhiqej nga Mimoza Kusari-Lila. Ndërsa, tani është një nga menaxherët kryesorë në bizneset e Behgjet Pacollit në Kosovë.
Ministria e Bujqësisë pritet të jetë e udhëhequr nga Fatmir Matoshi, kryetar i AKR-së në Kamenicë.
Dardan Gashi, që dikur ishte në AKR dhe tash në Listën Rugova, pritet të jetë sërish ministër i Ambientit. /Gazeta Metro/