Deputetja e Kuvendit të Kosovës nga radhët e Lëvizjes Vetëvendosje, Fitore Pacolli ka reaguar pasi në Kuvend ka dështuar të miratohet ndryshimi dhe plotësimi i Ligjit për Zgjedhjet e Përgjithshme.
Pacolli ka thënë se LDK, PDK, AAK dhe Lista e Vuçiqit janë bërë bashkë kundër mërgatës, transmeton Telegrafi.
“Ata votuan kundër ndryshimit dhe plotësimit të Ligjit për zgjedhjet e përgjithshme. Votuan kundër ndryshimeve që do të mundësonin votimin e mërgatës në ambasada dhe Konsullata të Republikës së Kosovës”, ka shkruar Pacolli në llogarinë e saj zyrtare në Facebook.
Tutje, deputetja ka shkruar se votimi i kësaj pike do të përsëritet përsëri në Kuvend.
“Tani mërgata duhet të organizohet e të bëjë presion mbi deputetët që votojnë kundër interesit të mërgatës e shtetit të Kosovës”./Telegrafi/
