Presidentja Vjosa Osmani, ka reaguar pas vendimit të Departamentit amerikan të Thesarit, i cili ka futur në listën e sanksioneve, Aleksandar Vulinin, drejtorin e Agjencisë së Inteligjencës Serbe-BIA.
Osmani ka thënë se Vulini dhe grupi i tij dëmtoi demokracinë dhe kërcënoi paqen në rajonin tonë.
Ajo theksoi se Vulin i shërbeu interesit keqdashës të Rusisë dhe krimit të organizuar transnacional, duke minuar kështu stabilitetin e rajonit.
“Unë përgëzoj SHBA-në për vendimin për ta sanksionuar atë. Së bashku me aleatët tanë do të luftojmë ndikimin e akterëve të tillë keqdashës”, ka shkruar ajo.
Sipas Thesarit, Vulin është përfshirë në afera korruptive për “të shtyrë përpara agjendat e tij politike dhe interesat e tij personale në kurriz të paqes dhe stabilitetit në Ballkanin Perëndimor”.
Vulin më herët ka shërbyer si ministër i Mbrojtjes dhe i Brendshëm në Serbi.
Departamenti amerikan i Thesarit tha se nuk do të hezitojë që të shënjestrojë aktorët “që abuzojnë me pozitat e tyre për të përfituar duke minuar qeverisjen efektive dhe demokratike në Ballkanin Perëndimor”.
“Veprimet e sotme mbajnë përgjegjës Aleksandar Vulinin për veprimet e tij korruptive dhe destabilizuese që po ashtu kanë lehtësuar aktivitetet malinje të Rusisë në rajon”, tha nënsekretari i Thesarit për Terrorizëm dhe Inteligjencë Financiare, Brian E.Nelson.
Vendosja e sanksioneve nënkupton që të gjitha pronat që Vulini mund të ketë në SHBA, apo që kontrollohen nga qytetarë amerikanë, do të bllokohen.
Po ashtu, atij i ndalohet që të bëjë transaksione me shtetasit amerikanë./Telegrafi/
Vulin&co damaged democracy and threatened peace in our region. He served Russia’s malign interest & transnational org.crime, thus undermined reg. stability. I applaud the US for the decision to sanction him. Together with our allies we’ll fight the influence of such malign actors pic.twitter.com/haEVuhDYPm
— Vjosa Osmani (@VjosaOsmaniPRKS) July 11, 2023