Presidentja Kosovës, Vjosa Osmani, të mërkurën, ka takuar ministrin e Mbrojtjes, Ejup Maqedoncin dhe komandantin e FSK-së, gjenerallejtënant Bekim Jashari.
Ajo e ka uruar ministrin Maqedonci dhe gjenerallejtënant Jasharin për angazhimin e institucioneve të mbrojtjes në misionin e tyre të shenjtë.
Po ashtu, Osmani mes tjerash ka shkruar se ushtria e Kosovës po fuqizohet çdo ditë si partnere e besueshme e ushtrive aleate në NATO.
“Ushtria e Kosovës po fuqizohet dita-ditës, si partnere e besueshme e ushtrive aleate në NATO. Sot përgëzova Ministrin e Mbrojtjes, Ejup Maqedonci dhe Komandantin e FSK-së, Gjenerallejtënant Bashkim Jashari për angazhimin e institucioneve tona të mbrojtjes në misionin e shenjtë që kanë”, ka shkruar Osmani në Facebook.
Ndryshe, SHBA njoftoi më 11 Janar se ka pranuar kërkesën e Kosovës për blerjen e 246 sistemeve kundërajrore Javelin, që prodhohen në SHBA.
Departamenti amerikan i Shtetit tha se blerja e tyre do t’i kushtojë Kosovës 75 milionë Dollarë.
Tani kjo çështje është dërguar në Kongresin Amerikan për miratim.
Derisa së fundmi Mbretëria e Bashkuar ka marrë vendim për heqjen e vizave për personelin e Ministrisë së Mbrojtjes dhe FSK-së, që zhvillojnë aktivitete ushtarake dhe zyrtare.
Procesi i transformimit të FSK-së në Forcë të Armatosura të Kosovës nisi në dhjetor të vitit 2018, kur Kuvendi i Kosovës miratoi ndryshimet ligjore për ta ndryshuar mandatin e FSK-së.
Ky proces pritet të zgjasë dhjetë vjet, deri në vitin 2028.
FSK-ja, aktualisht, ka rreth 2.500 pjesëtarë. Pas periudhës së tranzicionit, ky numër pritet të rritet në mbi 7.500 dhe të përfshijë pjesëtarë aktivë dhe rezervistë.
Buxheti i ndarë për këtë vit për Ministrinë e Mbrojtjes së Kosovës është mbi 153 milionë euro./Telegrafi/
