Kandidatja e LDK-së për kryeministre, Vjosa Osmani sot pasdite është takuar me qytetarët e Pejës.
Ajo gjatë një fjalimi në parkun e paqes “Ibrahim Rugova në këtë qytet, tha se liderët e partive në pushtet kanë dhënë shembull të turpërimit, mashtrimit, vjedhjes dhe abuzimit me shtetin”.
Po ashtu tha se “shteti ndërtohet me nder, jo duke vjedhur”, teksa u zotua se “shtetin e kapur do t’ua kthejnë qytetarëve”.
“Çka kemi parë ne në këto vite është, se njëri thotë: ta korrigjojmë shtetin, e tjetri thotë s’kam kohë me u marrë me shtetin, se do të merrem me punë më të mëdha. E çka kanë qenë ato punë më të mëdha, skema korruptive. Prandaj, edhe ne do ta mbrojmë me guxim. Të nderuar qytetarë, në shtetin e Kosovës as nuk e korrigjojmë, as nuk e ndajmë, as nuk e bashkojmë e as nuk e zhbëjmë, sepse Republika e Kosovës është projekt i përhershëm, nuk është i përkohshëm”, tha Osmani.
Kandidatja për kryeministre nga radhët e LDK-së ngriti edhe shqetësimin e ndërtimit të hidrocentralit mbi Lumëbardhë, për çka tha se si Qeveri së bashku me kryetarin e Pejës do ta parandalojnë dëmtimin e ambientit në Pejë dhe Rugovë.
“Ne guximin duhet ta mbajmë edhe nga rreziqe të tjera të brendshme. Kush më mirë se ju pejanët e dinë më mirë se çka do të thotë që njerëz të pa përgjegjshëm, për xhepat e tyre, e rrezikojnë shëndetin e juaj. Për xhepat e tyre rrezikojnë ambientin e juaj ku jetoni. E ju them se nuk do të ketë hidrocentral mbi Lumëbardhë dhe pikë. Gazmend (Muhaxheri) nuk do të jetë vetëm, sepse hidrocentralin do ta parandalojë Qeveria e Republikës së Kosovës, prandaj ne do të veprojmë me guxim”, theksoi Osmani.
Ndryshe, gjatë vizitës në Pejë, Vjosa Osmani është takuar me struktura të partisë dhe kryetari i Degës së LDK-së, Gazmend Muhaxheri. /kp/Telegrafi/