Mos votimi i Komisionit Hetimor Parlamentar për çështjen e energjisë elektrike, në seancën e djeshme të Kuvendit, ka bërë që opozita sot të bojkotojë edhe mbledhjet e Komisioneve Parlamentare.
Pas bojkotit të mbledhjes së Komisionit për Legjislacion, partitë opozitare kanë bojkotuar edhe mbledhjen e Komisionit për Integrime Evropiane ku ishte paraparë raportimi i ministres së Drejtësisë, Albulena Haxhiu.
Në deklarimin për bojkot, deputetja e PDK-së, Blerta Deliu-Kodra, ka thënë se s’do të marrë pjesë në votimin e asnjë projektligji pa miratimin e komisionit hetimor.
“Me këtë qasje arrogante të Qeverisë nuk do të marrim pjesë në votimin e asnjë projektligji pa i hapur rrugë komisionit hetimor”, është shprehur ajo.
Se do ta bojkotojnë këtë raportim e tha edhe deputetja e AAKs-, Time Kadrijaj.
“Besoj që ky komision nuk plotëson kushtet dhe nuk votojmë projektligje derisa të formohet komisioni hetimor. Ta përfundojmë këtë mbledhje”, tha Kadrijaj.
Ministrja Haxhiu gjatë largimit nga komisioni ka thënë se në të kaluarën “ka qenë e vështirë që të vinin ministrat në raportim, por tash deputetët s’po pajtohen”.
Ndryshe dje gjatë seancës së Kuvendit, opozita këmbëngulte që Komisioni të formohet, në të kundërtën sipas tyre nuk ka kuptim të marrin pjesë në votime tjera.
Tri partitë opozitare, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës kanë deklaruar se nuk do të marrin pjesë në votime tjera deri në formimin e Komisionit hetimor. /Telegrafi/