Pep Guardiola ka kritikuar kritikët e tij për mungesën e suksesit evropian në Manchester City, pasi ai sugjeroi se qëndrimi i tij si menaxher i klubit nuk do të konsiderohet si një dështim nëse ai nuk është në gjendje të fitojë Ligën e Kampionëve.
Guardiola ka fituar titullin e Ligës Premier katër herë në gjashtë vitet e fundit, por ai shpesh është vënë në shënjestër të kritikëve për mosfitimin e trofeut evropian.
Dhe tani Guardiola i është kundërpërgjigjur kundërshtuesve duke sugjeruar se ai nuk është “mjeshtri i universit” dhe se të fitosh gjithçka nuk është e mundur.
“Njerëzit mund të thonë se është një justifikim, por unë nuk jam këtu për të fituar Ligën e Kampionëve. Pronarët nuk më thanë ta fitojë atë. Natyrisht, ata e duan dhe unë jam i pari që e dëshiroj. Por ishte e njëjta gjë me Bayern Munichun dhe me Barcelonën, ku e fitova dy herë”, ka thënë fillimisht Guardiola.
“Çdo vit dua të fitoj të katër trofetë. Dhe nëse do të jem menaxher pas 30 ose 40 vjetësh, do të dëshiroj të fitoj Ligën e Kampionëve çdo sezon. Por, unë nuk ndjeva një dështim në dy vitet në Barcelonë dhe tre me Bayernin kur nuk fituam”.
“Ne duam ta fitojmë atë – por në të njëjtën kohë unë nuk jam mjeshtër i universit”.
“Ne përpiqemi ta bëjmë atë. Ishim më afër sezonin e kaluar – dhe do të përpiqemi përsëri këtë sezon. Por, unë jam i vetëdijshëm se sa të vështirë janë kundërshtarët dhe sa e vështirë është konkurrenca”, përfundoi trajneri i Cityt. /Telegrafi/