Drita e ka regjistruar fitoren e tretë në këtë fillim sezoni në Superligën e Kosovës në futboll duke mposhtur kampionin Feronikeli në Stadiumin e Qytetit në Gjilan.
Trajneri Ardian Nuhiu i është gëzuar këtij triumfi duke thënë se të zgjedhurit e tij i merituan tri pikët.
Ai ka thënë se futbollistët e tij u angazhuan gjatë gjithë sfidës, ishin dominues në gjysmën e parë dhe me meritë dolën fitimtarë në fund.
Sipas trajnerit të ‘Intelektualëve’, mysafirët ishin mbrojtur në fraksionin e parë, ndërsa në gjysmën e dytë, skuadra e tij u tërhoq, pasi duhej ta mbronte rezultatin.
“Ishte një derbi dhe e rëndësishme ishte vetëm fitorja”, është shprehur Nuhiu pas ndeshjes dhe e ka vlerësuar lartë në veçanti fazën e tij të mbrojtjes.
Pas xhiros së katërt, Drita e ndan kreun e tabelës me rivalin lokal, Gjilanin, me nga nëntë pikë. /Telegrafi/