Përveç komenteve mbi performancat dhe çmimet e ndara në “Top Music Awards”, një gjë tjetër që tërhoqi vëmendjen e publikut dhe mediave ishte një “konflikt në distancë” mes Ledion Liços dhe Noizyt, pasi prezantuesi e thumboi këtë të fundit gjatë nisjes së eventit, ndërkohë që reperi nuk e la me kaq duke ofenduar nikoqirin e spektaklit në një postim në Instagram.
Duke qenë se Ledioni ishte gjithë kohës i angazhuar në moderimin e evenimentit, nuk pati një reagim nga ana e tij ndaj ofendimeve të reperit, ndaj për të marrë vesh se çfarë mendonte Ledioni për këtë situatë, Blitz.al arriti t’i marrë atij një prononcim pak minuta pas mbylljes së ceremonisë së ndarjes së çmimeve.
I pyetur se çfarë komenti ka për postimin e Noizyt që po qarkullonte kudo nëpër rrjete sociale, Liço u përgjigj: “Nuk kam asnjë koment për këtë. Njerëzit janë të lirë në faqet e tyre në Instagram apo Facebook…”.
Ndërkohë, pyetjes se pse mund të ketë reaguar reperi në këtë mënyrë, Ledioni iu përgjigj: “Varet se si është ndier në atë moment, por unë nuk kam asnjë marrëdhënie personale me artistët, i dua dhe i pëlqej si profesionistë për atë që bëjnë…”.