Sergei Chemezov, kreu i korporatës së madhe ruse Rostec, tha se ai ishte mirënjohës ndaj prodhuesve kinezë të automobilave për plotësimin e boshllëkut të krijuar nga largimi i markave perëndimore.
Sipas mediave të huaja, përcjell Telegrafi, bëhet fjalë për kompaninë Rostec që është deri tani lojtari më i fuqishëm i armëve dhe automobilave në Rusi.
Prodhuesit perëndimorë të makinave braktisën tregun rus pasi Rusia dërgoi mijëra trupa në Ukrainë, duke u dorëzuar prodhuesve kinezë të makinave një pjesë të madhe të tregut rus të makinave.
Kështu, siç thuhet më tej, makinat e reja kineze janë tani kudo në rrugët e Moskës.
“Pas largimit të markave perëndimore, pati një mungesë makinash në treg dhe duhej të mbulohej disi. Meqë ra fjala, ne duhet t’u themi faleminderit kinezëve”, citohet të ketë thënë Chemezov në përgjigjet me shkrim ndaj një kërkese për intervistë në Reuters.
“Kur gjermanët, japonezët dhe koreanët u treguan rusëve “gishtin e mesëm”, industria kineze e automobilave na mbështeti”, ka thënë më tej Chemezov, duke shtuar se shteti duhej të gjente një zgjidhje.
Chemezov, një aleat i ngushtë i presidentit rus Vladimir Putin, thotë se Shtetet e Bashkuara dhe aleatët e saj perëndimorë rrezikojnë të shkaktojnë një luftë globale nëse Uashingtoni vazhdon të “provokojë” konfliktin në Ukrainë dhe të lejojë Kievin të sulmojë territorin rus.
Deklaratat e tij ofrojnë një pasqyrë të rrallë të të menduarit në rrethin e brendshëm të Putinit pas një inkursioni të papritur ukrainas në rajonin Kursk të Rusisë, të cilit presidenti ka premtuar një përgjigje “të denjë”, por nuk ka thënë ende se çfarë do të sjellë kjo.
Chemezov, CEO i korporatës Rostec, e cila furnizon shumë nga armët ruse për luftë, tha se Rusia ndihej e sigurt dhe kishte armë të mjaftueshme për më shumë se dy vjet në atë që Kremlini e quan operacionin e saj special ushtarak (SVO) në Ukrainë.
Ai përsëriti qëndrimin e Kremlinit se konflikti është një betejë midis Perëndimit dhe Rusisë. /Telegrafi/