Artistja shqiptare me famë botërore, Bebe Rexha, di gjithmonë se si të jetë pranë fansave të saj.
Së fundmi, ajo ka vendosur të publikojë në rrjetin social Instagram një video, ku shfaqet në një ditë të zakonshme pa makijazh, teksa jep një mesazh motivues për ndjekësit e saj.
“Përshëndetje, nuk e kam bërë kurrë një gjë tillë më përpara, por doja t’ju lija një mesazh sot, dhe mesazhi është ky: Ti je një prapanicë e madhe, je i fuqishëm, je i fortë, dhe ke gjithçka që të nevojitet që të mund t’i bësh ëndrrat e tua realitet. Unë dua vetëm t’ju jap energji, sepse ti je i/e madhe”, ka thënë ndër të tjerash Bebe Rexha.
E njëjta ka provuar me qindra herë se është një person i zakonshëm në përditshmëri, dhe këtë mundohet t’ua bëjë me dije të gjithë fansave të saj.
Bebe Rexha ka treguar për problemet që ka me peshën, teksa nuk ka hezituar të publikojë fotografi ku ka treguar celulitin apo defektet e tjera në trupin e saj.
Të qenit reale me fansat e saj është taktika që ajo ndjek për të qenë sa më afër tyre, duke mos tentuar t’i bëjë për vete me imazhe që janë të punuar me ‘photoshop’, duke i bërë ata të mendojnë se ajo është perfekte.
Ndaj dhe shumë prej këngëve të saj transmetojnë të njëjtin mesazh – atë që secili duhet të guxojë të jetë vetvetja. /Telegrafi/
