Një student në Universitetin e Karolinës së Jugut është qëlluar me armë zjarri, pasi e kishin ngatërruar me një hajn derisa u përpoq të hynte në shtëpinë e gabuar në lagjen ku jetonte.
Studenti i identifikuar nga zyra e kërkimit të qarkut Richland si Nicholas Anthony Donofrio, filloi vitin e dytë në Universitet javën e kaluar, transmeton Telegrafi.
Donofrio me prejardhje nga Connecticut, u vra në orët e hershme të mëngjesit të shtunës në një shtëpi, disa blloqe larg kampusit të Universitetit në qytetit Columbia.
Policia thotë se fillimisht janë thirrur për dyshime për vjedhje, por kur kanë mbërritur në pronë, kanë gjetur trupin e viktimës në verandën e përparme.
“Pak para orës 2 të mëngjesit, oficerët u dërguan në bllokun 500 të South Holly për një vjedhje të raportuar në shtëpi. Gjatë rrugës, morëm një raport tjetër për të shtëna”, u tha nga policia.
Me të mbërritur në vendin e ngjarjes, policia gjeti një burrë të vdekur në verandë me plagë të armës së zjarrit në pjesën e sipërme të trupit.
“Informacionet paraprake tregojnë se Donofrio, i cili jetonte në South Holly, po përpiqej të hynte në shtëpinë e gabuar kur u qëllua për vdekje”, shtoi policia.
Siç raporton Independent, për ngjarjen ka nisur hetimi, por ende nuk bëhet i ditur emri i personit që ka tërhequr këmbëzën. /Telegrafi/