Krzysztof Piatek është njeriu i momentit tek Genoa, por edhe golashënuesi më i mirë në Serie A.
Sulmuesi i talentuar polak ka shkëlqyer këtë fillim edicion me fanellën e klubit italian.
Ndeshja e tij e parë ishte në Kupën e Italisë me fanellën e Genoas, ku në takim ndaj Lecces shënoi katër gola për 60 minuta lojë.
Kaq mjaftoi që Piatek të bëhet lojtari më i ndjekur nga agjentë të ndryshëm të klubeve evropiane.
Por edhe starti për të në Serie A ka qenë i shkëlqyer me fanellën kuq e blu.
Në ndeshjen e parë polaku mungoi, por nga ndeshja e dytë ai ka shkëlqyer.
Pesë ndeshje në Serie A, gjashtë gola të shënuar, shifra të çmendura.
E në ndeshjen e fundit të Genoas ndaj Chievos, në stadium ishin prezentë skaut të Bayernit për ta parë nga afër sulmuesin.
23-vjeçari shënoi një gol në këtë sfidë dhe ishte ndër më të mirët në fushë.
Kampioni në fuqi i Gjermanisë, po e sheh Paitekun si zëvendësuesin adekuat të bashkëkombësit të tij Robert Lewandowski.
Por përveç Bayernit në garë për lojtarin janë futur edhe skuadrat tjera të mëdha si Borussia Dortmund, Chelsea dhe Juventus.
Genoa e bleu për vetëm 4,5 milionë euro në verë Piatekun nga Cracovia, ndërsa tani synon që nga shitja e tij të fitojë rreth 50 milionë euro. /Telegrafi/