Kreu i Shtetit, Bujar Nishani, nis sot një raund konsultimesh për reformën në drejtësi dhe paketën ligjore që shoqëron ndryshimet kushtetuese, tashmë të miratuara. Këto ndryshime hyjnë në fuqi më 11 gusht, duke i hapur rrugë miratimit të paketës me 7 ligje për sistemin e drejtësisë. Sot presidenti i Republikës do të zhvillojë në orën 11:00 një takim konsultues me konstitucionalistë, ekspertë ligjorë dhe akademikë.
Presidenti Bujar Nishani bëri apel pak ditë më parë për përshpejtimin e punës për miratimin e 7 ligjeve që i hapin rrugën zbatimit të reformës në drejtësi. Nishani tha se pas miratimit në Kuvend të reformës në drejtësi, ndryshimet kushtetuese hyjnë në fuqi në datë 11 gusht. Në bazë të ligjit, Presidenti i Republikës ka detyrimin që brenda 5 ditësh të shpallë shortin për përzgjedhjen e anëtarëve të Këshillit të Emërimeve në Drejtësi.
Por për shkak të ngecjes së procesit për 7 ligjet, kriteret për përzgjedhjen e anëtarëve nuk janë formalizuar ende në ligj. Kjo krijon një ngërç, i cili pengon nisjen e zbatimit të reformës në drejtësi sipas afateve të parashikuara në ligj, shkruan shekulli.
Nishani ftoi grupet parlamentare dhe ekspertët në një takim konsultativ të martën, në orën 11:00.