Ka tash e sa ditë që ka nisur një peticion online në rrjetin social Facebook, duke kërkuar nga shqiptarët që të nënshkruajnë për të kërkuar nga gjiganti Apple që ta njohë Kosovën si shtet të pavarur në hartat e tyre.
Aktualisht në Apple, Kosova paraqitet me vijë të hijezuar si krahinë e Serbisë, ndonëse në hartat zyrtare figuron si shtet sovran që nga shpallja e Pavarësisë në vitin 2008.
Në një kërkesë të tillë u përfshinë edhe vet yjet botërore me prejardhje shqiptare Rita Ora dhe Dua Lipa – madje kjo e fundit nxiti një debat të zjarrtë me publikimin e flamurit “Autokton”, duke treguar ndjenjën e zjarrtë të patriotizmin e saj, gjë cila nuk u prit mirë nga serbët.
Pak ditë pasi është kthyer në një prej çështjeve më të diskutuar në vend, në rrjetet sociale nis tashmë edhe një kampanjë e re e adresimit ndaj Apple që ta njohë Kosovën si shtet.
Faqja Tapped Albanian ka publikuar në Instagram një video, përmes së cilës tregon se si çdo përdorues i pajisjeve Apple, mund të hyjë te harta zyrtare e kompanisë dhe të raportojë një problem.
E problemi i raportuar duhet të jetë “Vendosni Kosovën në hartat e Apple (Në anglisht: Put Kosovo on Apple maps)”.
Postimi i cili kërkon vëmendjen e të gjithë shqiptarëve ka etiketuar dhjetëra artistë të njohur shqiptarë, duke kërkuar që me influencën e tyre të shpërndajnë sa më shumë të jetë e mundur këtë kampanjë.
Njëra ndër këngëtaret që i është përgjigjur pozitivisht një nisme të tillë është Dafina Zeqiri, e cila ka publikuar në InstaStory një video të shkurtër të realizuar nga kompania e saj menaxhuese “Moneyz”, e cila gjithashtu tregon mënyrën se si mund të arrihet deri te një raportim i tillë ndaj Apple – e që një presion i tillë mbase mund ta bindë gjigantin e teknologjisë që ta njohë sovranitetin e Kosovës. /Telegrafi/
