Fjala dhe arti bashkohen për të formuar një realitet të ri, një univers ku emocionet dhe mendimet ndërthuren nëpërmjet fuqisë së letërsisë dhe interpretimit. Pikërisht një mbrëmje e tillë, e mbushur me ndjenja të thella dhe reflektime mbi trashëgiminë tonë kulturore, u zhvillua në Prishtinë, ku aktorja dhe autorja e njohur, Vlora Nikçi, promovoi librin e saj të dytë, “Mallkime dhe Bekime”.
Ky libër vjen pas suksesit të madh të “Kangë popullore erotike”, një vepër që solli në dritë pasurinë e folklorit erotik shqiptar dhe ngjalli debat e admirim në qarqet letrare dhe artistike.
Në ambientet e Mensës “Ramis Sadiku”, në një atmosferë intime mes miqsh të shumtë dhe artistësh të njohur, promovimi i këtij botimi të ri u karakterizua nga diskutime të pasura dhe interpretime artistike, duke e kthyer mbrëmjen në një përvojë që kapërceu kufijtë e një eventi të zakonshëm letrar.
Telegrafi ishte pjesë e këtij momenti kulturor të veçantë, duke ndjekur nga afër emocionet dhe mesazhet e autores.
Një vepër me emocione të veçanta
Gjatë intervistës për Telegrafin, Vlora Nikçi shprehu emocionet e saj të forta për këtë botim, duke theksuar se përjetoi ndjenja të fuqishme gjatë këtij promovimi:
“Shumë emocion, emocion i veçantë, edhe emocionohem më shumë se e para, bile e thashë me vete, mos ndoshta mallkimi meqë ka qëllu për mallkimin, po më njeh njëfarë mallkimi me këtë libër. Ka qenë shtytja e parë, siç e thashë edhe në skenë, prej doktor profesor Sadri Fetiut. Ai më shtyu që unë duhet ta bëja patjetër këtë fillim. Vërtet e kisha pak vështirë, se më dukej si një temë e rëndë. Unë erotikën e dua, por kjo më dukej pak mallkim dhe e vështirë, por pastaj mora guximin. Mendimin e tij e mora shumë seriozisht dhe ia dola”.
Aktorja dhe autorja gjithashtu shtoi: “Të gjithë lexuesve të botës ju them, atyre të huajve, zbuloni çfarë vendi dhe trashëgimie kemi. Tyre tanëve ju them, zbuloni vetveten. Trashëgimia e jonë të mëson për veten tuaj, kush jemi ne dhe pse jemi kështu e s’jemi ashtu. Trashëgimia mëson edhe profesion, por është shumë më e vlefshme kur njeh trashëgiminë tënde kulturore. Mua kjo më ndihmon në profesion si aktore”.
Interpretime artistike dhe panelistët e ftuar
Në promovimin e librit morën pjesë panelistët e njohur Rita Petro, Shaban Sinani dhe Sali Bytyqi, të cilët diskutuan mbi rëndësinë e kësaj vepre në kontekstin e trashëgimisë kulturore dhe letrare shqiptare.
Ndërkohë, aktorët Vlora Nikçi, Arta Muçaj, Armend Baloku, Bislim Muçaj, Xhejlande Turbunja, Lulzim Bucolli dhe Donika Ahmeti interpretuan pjesë nga libri, duke sjellë emocion dhe energji artistike në event.
Ky botim i dytë i Nikçit synon të hapë një dritare të re mbi traditën, identitetin dhe ndërlidhjen mes të kaluarës dhe së tashmes, duke e bërë atë një vepër të rëndësishme për lexuesit dhe studiuesit e kulturës shqiptare. /Telegrafi/
Fotografi të tjera nga promovimi:
