Instituti Kombëtar i Shëndetësisë Publike të Kosovës (IKSHPK) ka bërë të ditur se sot janë shëruar 21 pacientë të infektuar me COVID-19, kurse tre persona kanë ndërruar jetë.
Sipas IKSHPK, deri më tani nga 598 persona të infektuar me coronavirus, 123 janë shëruar, kurse 15 kanë ndërruar jetë.
Nga tre personat që kanë ndërruar jetë sot, dy janë nga Mitrovica e Veriut kurse njëri nga Leposaviqi.
“Sot më 20 prill 2020, janë shëruar edhe njëzet e një (21) pacientë, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej njëqind e njëzet e tre (123)”, thuhet në raportin e IKSHPK, transmeton Telegrafi.
Sipas IKSHPK, Nga data 08 shkurt deri më 20 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 5.009 mostra të dyshimta në virusin SARS-CoV-2 dhe prej tyre pozitive rezultojnë gjithsej pesëqind e nëntëdhjetë e tetë (598) raste, ndërsa gjithsej pesëmbëdhjetë (15) raste kanë ndërruar jetë dhe të cilët kanë pasur sëmundje të tjera shoqëruese. /Telegrafi/