Hajrush Kllokoqi ka 15 vjet që nuk është angazhuar si punëtor i rregullt. Ai çdo ditë zgjohet me shpresën që dikush do t’i ofrojë punë krahu, të cilën e bën për një dekadë e gjysmë.
Kllokoqi shprehet i zhgënjyer me institucionet e Kosovës. Thotë se ka qenë shumë herë në zyrën për punësim, mirëpo asnjëherë nuk i kanë dalë në ndihmë, raporton KTV.
Fatin e njëjtë me Hajrush Kllokoqin e kanë edhe shumë të tjerë në Kosovë. Numri i atyre që kanë kërkuar punë vetëm gjatë vitit 2015, në zyrën e punësimit është rreth 110 mijë, prej tyre janë punësuar vetëm 7 mijë.
E në Ministrinë e Punës dhe të Mirëqenies Sociale thonë se besimi i qytetarëve në këtë institucion është kthyer.
Zv.ministrja, Rita Hajzeraj, thotë se janë duke bashkëpunuar edhe me shumë organizata për t’i punësuar të rinjtë edhe jashtë vendit.
Mirëpo, marrë parasysh numrin e madh që kërkojnë punë, sipas saj, nuk po vërehet numri i atyre që po punësohen, transmeton Koha.net.
Në një raport të publikuar nga Agjencia e Statistikave të Kosovës, thuhet se shkalla e papunësisë në Kosovë është 35 për qind. Mirëpo, përfaqësues të sindikatave dhe njohës të metodologjisë së hulumtimeve vlerësojnë se numri i të papunëve është shumë më i lartë.