Zyra e kryeministrit izraelit Benjamin Netanyahu tha sot se ai i ka paraqitur qeverisë së tij një rezolutë që refuzon deklaratën e njëanshme të një shteti palestinez, në përgjigje të një plani të supozuar të SHBA për të vendosur një “afat përfundimtar” për krijimin e Palestinës, shkruan Times of Israel.
Netanyahu u tha ministrave që të nënshkruanin dokumentin “në kohën e deklaratave të dëgjuara kohët e fundit në komunitetin ndërkombëtar, për përpjekjen për t’i imponuar Izraelit një shtet palestinez në mënyrë të njëanshme”, transmeton Telegrafi.
“Izraeli kundërshton plotësisht diktatet ndërkombëtare për një zgjidhje të përhershme me palestinezët. Një zgjidhje e tillë mund të arrihet vetëm përmes negociatave të drejtpërdrejta mes palëve pa parakushte”, thuhet në rezolutë.
Dokumenti njofton se “Izraeli do të vazhdojë të kundërshtojë njohjen e njëanshme të një shteti palestinez”.
Gjithashtu, vlerësohet se një rrëfim i tillë pas masakrës së 7 tetorit do të ishte “një shpërblim i madh për terrorizmin, një shpërblim i paprecedentë dhe do të parandalonte çdo marrëveshje paqeje në të ardhmen”.
Mbretëria e Bashkuar, SHBA dhe vende të tjera perëndimore kanë mbështetur idenë e një shteti të pavarur palestinez, por thanë se pavarësia palestineze duhet të jetë pjesë e një zgjidhjeje të negociuar.
Netanyahu ka refuzuar vazhdimisht mundësinë e krijimit të një shteti të pavarur palestinez pas luftës kundër Hamasit. /Telegrafi/