Kryeministri izraelit, Benjamin Netanyahu raportohet t’i ketë thënë Sekretarit amerikan të Shtetit, Antony Blinken se Izraeli është i përgatitur të vazhdojë luftën i vetëm kundër Hamasit, ku kohët e fundit janë tensionuar marrëdhëniet mes dy aleatëve për konfliktin gjashtëmujor.
Në një takim kokë më kokë, Netanyahu deklaroi se i tha Blinkenit se vlerësonte mbështetjen e SHBA-së në luftën e saj kundër Hamasit dhe se Izraeli e pranon se duhet të mbrojë civilët.
Megjithatë, ai përsëriti planet për të hyrë në Rafah, ku më shumë se një milion njerëz janë në strehimore të improvizuara, raporton skynews.
“Unë thashë gjithashtu se nuk kemi asnjë mënyrë për ta mposhtur Hamasin pa shkuar në Rafah dhe pa eliminuar pjesën tjetër të batalioneve. I thashë se shpresoj ta bëjmë me mbështetjen e SHBA-së, por nëse duhet – do ta bëjmë vetëm”, tha ai në një deklaratë video për gazetarët.
Izraeli pretendon se Rafah është bastioni i fundit i militantëve të Hamasit dhe se ka një plan për të evakuuar civilët.
Ndryshe, Uashingtoni thotë se një sulm tokësor do të ishte një “gabim” dhe do të shkaktonte shumë dëm për ata që janë zhvendosur atje. /Telegrafi/
