Ministria e Kulturës, Rinisë dhe Sportit ka njoftuar me anë të faqes zyrtare se ka nënshkruar një memorandum bashkëpunimi me Komunën e Gjakovës, qëllimi i të cilit është krijimi i kornizës ligjore për bashkëpunimin dhe financimin e zbatimit të projektit për renovimin e stadiumit të qytetit në Gjakovë.
Pas stadiumit “Fadil Vokrri” në Prishtinë, “Adem Jashari” në Mitrovicë dhe atyre të qytetit në Pejë dhe Gjilan, MKRS ka në plan edhe rinovimin e “Stadiumit të Qytetit” në Gjakovë.
Është vet MKRS që ka njoftuar me anë të faqes zyrtare se kanë nënshkruar marrëveshje me Komunën e Gjakovës, ku vet zotohen të sigurojnë mjetet financiare prej nëntë milionë eurove, ndërsa Komuna ka për obligim zhvillimin e procedurave të prokurimit, punët ndërtimore si dhe mbikëqyrjen teknike.
“Është nënshkruar memorandum bashkëpunimi mes Ministrisë së Sportit dhe Komunës së Gjakovës, qëllimi i të cilit është krijimi i kornizës ligjore për bashkëpunimin dhe financimin e zbatimit të projektit për renovimin e stadiumit të qytetit në Gjakovë”.
“Sipas këtij memorandumi, MKRS-ja merr përsipër sigurimin e mjeteve financiare në shumën prej 9 milionë euro për vitet 2024, 2025 dhe 2026, ndërsa komuna ka për obligim zhvillimin e procedurave të prokurimit, punët ndërtimore si dhe mbikëqyrjen teknike”.
“Memorandumi i bashkëpunimit është nënshkruar ndërmjet u.d sekretarit të përgjithshëm të MKRS-së, Xheladin Krasniqi dhe kryetarit të Gjakovës, Ardian Gjini”, thuhet në njoftimin e MKRS. /Telegrafi/
